Elm və Təhsil Nazirliyi: Rus bölməsi bağlanmayacaq

Son günlər sosial şəbəkələrdə yayılan məlumatlara cavab olaraq Elm və Təhsil Nazirliyi bildirib ki, Azərbaycanda rus bölməsinin bağlanması ilə bağlı heç bir rəsmi qərar yoxdur.

İddia edilən “№217 nömrəli bildiriş”ə görə, 2025/2026-cı tədris ilindən etibarən ali təhsil müəssisələrində rus dilində tədrisin mərhələli şəkildə dayandırılması planlaşdırılır. Bildirişdə qeyd olunurdu ki, təhsil yalnız Azərbaycan və İngilis dillərində aparılacaq.

Nazirlik məsələ ilə bağlı rəsmi açıqlamasında bildirib ki, belə bir sənəd dərc edilməyib və ictimaiyyət yalnız rəsmi mənbələrə istinad etməlidir.

Haqqin.az-ın məlumatına görə, universitetlərdə bu tip qeyri-rəsmi məlumatların WhatsApp qruplarında yayıldığı təsdiqlənsə də, ali məktəblər nazirlikdən heç bir göstəriş almadıqlarını bildiriblər.

N.Təbrizli