Fond heyvanları da sığortalayacaq

 Azərbaycanda kənd təsərrüfatı heyvanlarının dövlət dəstəyi ilə sığortalanması proqramı çərçivəsində fermerlər iribuynuzlu və xırdabuynuzlu heyvanlarını müxtəlif risklərə qarşı cüzi ödənişlə qoruma imkanına malikdirlər. Bu barədə Aqrar Sığorta Fondu məlumat yayıb.

Fonddan verilən məlumata görə, inək və camışlar üçün baza sığorta haqqı illik 4,89%, qoyun və keçilər üçün isə 4,6% təşkil edir. Bu məbləğin 50%-i dövlət tərəfindən subsidiya olunur.

Misal üçün, 1 000 manat dəyərində inəyin illik baza sığortası fermerə 24,5 manata, 300 manatlıq qoyunun sığortası isə 6,9 manata başa gəlir. Əlavə riskləri əhatə edən genişləndirilmiş sığorta paketləri isə müvafiq olaraq 7,8% və 7,37% tariflə təklif olunur.

Sığorta olunan risklərə yoluxucu xəstəliklər, təbii fəlakətlər, vəhşi heyvanların hücumu, yanğın və zəhərlənmə halları daxildir. Genişləndirilmiş paketə avtomobil qəzası, elektrik cərəyanı, oğurluq və daşınma zamanı baş verən hadisələr də əlavə edilir.

Heyvanların sığortalanması üçün onlar Elektron Kənd Təsərrüfatı İnformasiya Sistemində qeydiyyatda olmalıdır. Sığorta müqavilələri 1, 2 və ya 3 illik bağlana bilər. Müddət artdıqca tariflərdə endirim tətbiq olunur.

Aqrar Sığorta Fondu fermerlərə ödənişlərin “AsanPay” sistemi vasitəsilə onlayn şəkildə həyata keçirilməsi imkanı yaratdığını da qeyd edib.

Aytac