Son bir həftədə təbiətə 81 min manatdan çox ziyan vurulub

Son bir həftə ərzində keçirilən nəzarət tədbirləri zamanı Bakı, Abşeron, İmişli və Füzuli rayonlarının müxtəlif ərazilərində yaşıllıqların qanunsuz kəsilməsi faktları qeydə alınıb. Bu barədə Dövlət Ekoloji Təhlükəsizlik Xidməti məlumat yayıb.

Qurumun açıqlamasına görə, araşdırmalar nəticəsində ümumilikdə 81,470 manat dəyərində ziyan vurulduğu müəyyən edilib. Qanunsuz kəsim halları Bakı şəhəri Xətai rayonu, Gəncə prospekti, N.Tusi küçəsi 28 ünvanında, Abşeron rayonu Xırdalan şəhəri Heydər Əliyev prospekti 167 ünvanında, həmçinin İmişli və Füzuli rayonlarının müxtəlif hissələrində aşkar olunub.

Faktlarla bağlı toplanmış materiallar cinayət tərkibi əlamətləri daşıdığı üçün hüquqi qiymət verilməsi məqsədilə Baş Prokurorluğa təqdim olunacaq.