Lisey və gimnaziyalara qəbul imtahanlarının nəticələri açıqlanıb

Azərbaycanda lisey və gimnaziyalara qəbul üzrə 25–27 iyun tarixlərində keçirilmiş imtahanların nəticələri açıqlanıb. Bu barədə Azərbaycan Respublikası Təhsil İnstitutu (ARTİ) məlumat yayıb. 

İmtahanlara ümumilikdə 29 min 375 şagird qeydiyyatdan keçib, onlardan 26 min 619 nəfəri ölkə üzrə 52 imtahan mərkəzində iştirak edib. İmtahan prosesi ümumilikdə uğurla təşkil olunub.

Lakin imtahanın gedişində bəzi hallarda qayda pozuntuları aşkar edilib və bu hallar məsul şəxslər tərəfindən aktlaşdırılıb. Təlimata uyğun olaraq, pozuntuya yol verən şagirdlərin nəticələri ləğv olunub.

Nəticələrin ətraflı təhlili zamanı bəzi uyğunsuzluqlar müəyyən edilib və təxminən 200 şagirdin nəticəsinin əlavə araşdırılması zəruri hesab olunub. Bu məqsədlə ARTİ-də xüsusi komissiya yaradılıb. Araşdırma prosesi şagirdlərin və valideynlərin iştirakı ilə həyata keçiriləcək.

Təhsil İnstitutu bildirib ki, aparılan tədbirlər şəffaflığın təmin olunması və bütün iştirakçıların hüquqlarının qorunması məqsədi daşıyır.