Neqativ hallar azalıb, amma vəziyyət hələ qənaətbəxş deyil - TƏBİB sədri

Son dövrlərdə tibbi xidmətlər sahəsində neqativ hallar azalsa da, vəziyyət hələ də tam qənaətbəxş deyil. Bu barədə Tibbi Ərazi Bölmələrini İdarəetmə Birliyinin (TƏBİB) İcraçı direktoru Vüqar Qurbanov bu gün keçirdiyi müşavirədə məlumat verib.

“Əvvəlki dövrlərlə müqayisədə neqativ hallar əhəmiyyətli dərəcədə azalıb. Lakin bu sahədə əldə olunan nəticələr bizi tam şəkildə qane etmir”, –  Qurbanov bildirib.

O qeyd edib ki, daxili nəzarət və monitorinq tədbirləri çərçivəsində baş verən bütün hallar təhlil olunur və bu məlumatlar əsasında konkret göstərişlər verilir.

Qurbanov xüsusilə reanimasiya və intensiv terapiya şöbələrində xəstələrin vaxtında və düzgün çeşidlənməməsi, keyfiyyətin idarə olunması, vətəndaş məmnunluğu məsələlərinə diqqət çəkərək, bu sahələrin ciddi şəkildə tənzimlənməli olduğunu vurğulayıb.

Onun sözlərinə görə, ölkə üzrə TƏBİB-in tabeliyindəki tibb müəssisələrinə gün ərzində 100 minə yaxın müraciət daxil olur.

“Bu, təkcə kəmiyyət yox, eyni zamanda keyfiyyət göstəricisidir. Lakin bu yük yalnız iri tibb müəssisələrinin üzərinə düşməməlidir. Müəssisə rəhbərləri nəzarəti gücləndirməli, xidmətin keyfiyyətinə cavabdehlik daşımalıdır”, –  icraçı direktor əlavə edib.

“Məqsədimiz vətəndaşlara daha keyfiyyətli, əlçatan və operativ tibbi xidmət göstərməkdir”, – o bildirib.

Gülnar Nazimqızı