Abituriyentlərin şəxsi məlumatları yalnız anonim şəkildə açıqlana bilər - Abbaszadə

Abituriyentlərin nəticələri ilə bağlı məlumatların açıqlanması yalnız anonim şəkildə və şəxsi məlumatların qorunması şərti ilə mümkündür. Bunu  Dövlət İmtahan Mərkəzinin (DİM) sədri Məleykə Abbaszadə bildirib. 

“Open Data layihəsinə qoşularkən çox ciddi şəkildə düşündük və qərara gəldik ki, təqdim etdiyimiz məlumatlar fərdi identifikasiya imkanı verməyən, yalnız data formatında olmalıdır,” – Abbaszadə bildirib.

Onun sözlərinə görə, şəxsin imtahan nəticələri yalnız həmin abituriyentin özü tərəfindən açıqlana bilər. 

“Bu, insan hüquqlarının qorunması məsələsidir. Heç bir qurum, o cümlədən DİM, abituriyentin icazəsi olmadan onun nəticələrini ictimailəşdirə bilməz,” –  o vurğulayıb.

Məleykə Abbaszadə həmçinin qeyd edib ki, bəzi iştirakçıların suallara cavab vermə faizləri ilə bağlı nəticələri təhlil edilərkən bəzi ciddi uyğunsuzluqlar müşahidə olunub. “

Mənə elə gəlir ki, illərdir hazırladığımız materiallar oxunmur. Halbuki həmin sualların cavabları bizim jurnallarımızda aylardır yer alır. Mən hər dəfə sual veriləndə cavabı jurnalın konkret səhifəsindən göstərirəm,” – Abbaszadə əlavə edib.

O bildirib ki, DİM-in təqdim etdiyi məlumatlar 2025-ci ilin may ayından etibarən Open Data platformasında yerləşdirilməyə başlanılıb və məlumatların təhlükəsizliyi təmin olunub.

N.Təbrizli