5-ci qrup üzrə qabiliyyət imtahanı verməyənlərin qəbulu təklifi ali məktəblər tərəfindən rədd edilib

5-ci ixtisas qrupu üzrə qabiliyyət imtahanı verməyənlərin də qəbulu ilə bağlı DİM-in irəli sürdüyü təklif ali məktəblər və aidiyyəti qurumlar tərəfindən qəbul edilməyib. Bunu 
Dövlət İmtahan Mərkəzinin (DİM) sədri Məleykə Abbaszadə bildirib.

“Müxtəlif ali məktəblər üçün müxtəlif qabiliyyət ixtisaslarını təqdim etdik və həmin sahələrin ayrıca – 5-ci ixtisas qrupu çərçivəsində – formalaşdırılmasını təklif etdik ki, məsələn, attestatla qəbul edilən şəxslər də bu ixtisaslara yönələ bilsin,” – Abbaszadə qeyd edib.

Onun sözlərinə görə, məqsəd bu sahəyə gələn abituriyentlərin profil fənləri üzrə ilkin biliklərə malik olmasını təmin etmək idi. 

“Biz izah edirdik ki, əgər bu ixtisasda riyaziyyat tələb olunursa, o zaman yüksək nəticə göstərənlər qəbul edilməlidir. Amma təklif rədd edildi,” –  o əlavə edib.

Abbaszadə bildirib ki, DİM bu istiqamətdə riyazi bilikləri yüksək olan, məsələn, 227 baldan yuxarı nəticə göstərən abituriyentlərin yönləndirilməsini nəzərdə tutmuşdu. Lakin bu təşəbbüs dəstək qazanmayıb və məsələ hələ də yalnız müzakirə predmetidir.

“Mən deyə bilmərəm ki, bu, tam səhv idi. Ola bilsin ki, bu cür addımların həyata keçirilməsi üçün əlavə təminat mexanizmləri yox idi. Amma məsələ açıq qalır,” – DİM rəhbəri vurğulayıb.

Beşinci qrupa imtahan verən abituriyentlər üçün 4400 yer müəyyən edilib.

N.Təbrizli