Ermənistan kommunikasiyalarla bağlı ABŞ-dan təkliflər alıb - Baş nazir

Ermənistanın baş naziri Nikol Paşinyan Cənubi Qafqazda kommunikasiyaların açılması ilə bağlı təkliflərin ABŞ tərəfindən təqdim edildiyini təsdiqləyib. Bu barədə o, iyulun 16-da İrəvanda keçirdiyi mətbuat konfransında məlumat verib.

“Bəli, ABŞ-dan təkliflər almışıq,” — Paşinyan jurnalistin Sünik bölgəsindən keçən yol(Zəngəzur dəhlizi - red.) ilə bağlı sualına cavab olaraq bildirib.

Baş nazir qeyd edib ki, Ermənistan müxtəlif dost ölkələrdən təkliflər alır və ictimaiyyət bu təşəbbüslər barədə bilavasitə və ya dolayı şəkildə məlumatlandırılır.

“Qeyd etmək çox vacibdir ki, istənilən məsələ Ermənistan Respublikasının ərazi bütövlüyü, suverenliyi və yurisdiksiyası çərçivəsində müzakirə olunur,” — Paşinyan əlavə edib.

Paşinyan həmçinin bildirib ki, Ermənistanın ərazi bütövlüyü və suverenliyi təmin edilmədən heç bir təşəbbüs və ya layihənin müzakirəsi mümkün deyil.

Daha əvvəl Karneqi Fondunun analitiki Olesya Vardanyan iki diplomatik mənbəyə istinadla yazmışdı ki, ABŞ administrasiyası — hələ Donald Tramp dövründə — Azərbaycanı Naxçıvanla Ermənistan ərazisindən keçməklə birləşdirən yol üzrə İrəvan və Bakıya təkliflər təqdim edib.

Həmin təklifin, mənbələrə görə, 2008-ci il Rusiya-Gürcüstan müharibəsindən sonra Avropa İttifaqının təşəbbüsü ilə formalaşdırılmış, mübahisəli bölgələrdən keçən marşrutların neytral vasitəçi tərəfindən — məsələn, İsveçrə şirkəti — idarə olunmasını nəzərdə tutan plana bənzədiyi bildirilir.

Aytac