Əliyev Xocalıda kərpic zavodunun açılışında iştirak edib

Prezident İlham Əliyev cümə axşamı Xocalı rayonunun Daşbulaq kəndində inşa edilən kərpic zavodunun açılışında iştirak edib. 

Layihə dəyəri 8,5 milyon manat olan müəssisənin illik istehsal gücü 16,2 milyon ədəd kərpicdir. Zavodda hazırda 60 nəfər çalışır, gələcəkdə bu sayın 120-yə çatdırılması planlaşdırılır. İşçilərin əksəriyyəti işğaldan azad edilmiş ərazilərin sakinləridir.

İstehsalatda Almaniya və Türkiyə istehsalı olan avadanlıqlar tətbiq olunub, enerji səmərəliliyi və ətraf mühitin qorunmasına xüsusi diqqət yetirilib. Zavodun əsas xammalı yaxınlıqdakı “Xocalı” gil yatağından təmin olunur.

Zavod, işğaldan azad edilmiş ərazilərdə fəaliyyət göstərən müəssisələrə tətbiq edilən vergi və sosial sığorta güzəştlərindən yararlanacaq.