Audiovizual Şura “Xəzər TV”yə cinsi ayrı-seçkiliklə bağlı xəbərdarlıq edib

Azərbaycan Respublikası Audiovizual Şurası bu gün keçirilən onlayn iclasında “Xəzər TV”də yayımlanan “Qonaqcanlı” proqramında səsləndirilmiş fikirləri müzakirə edərək televiziya kanalına xəbərdarlıq edib.

Şuradan verilən məlumata görə, 16 iyul 2025-ci il tarixli proqramda kişi-qadın münasibətləri mövzusunda aparıcının sualına cavab verən qonağın “Allah kişini üstün yaradıb” kimi ifadələri cinsi ayrı-seçkilik kimi qiymətləndirilib. Müzakirələr zamanı bildirilib ki, aparıcının əvvəlcədən verdiyi sual və qonağın fikirlərinə etiraz etməməsi bu cür diskriminativ fikirlərin yayılmasına şərait yaradıb.

Audiovizual proqramların monitorinqi və təhlili nəticəsində proqramın “Media haqqında” Qanunun 14.1.4-cü maddəsini – cinsi ayrıseçkiliyin təbliği qadağasını – pozduğu müəyyən edilib və bu rəy Şuranın hüquqşünasları tərəfindən də təsdiqlənib.

İclasda iştirak edən Şura üzvləri yekdilliklə “Xəzər TV”yə xəbərdarlıq edilməsinə və bütün yayımçılardan gələcəkdə oxşar mövzularda qanunvericiliyin tələblərinə riayət olunmasının tələb edilməsinə dair qərar qəbul ediblər.