100 minə yaxın ailə sənədsiz evlərini qeydiyyatdan keçirmək imkanı əldə edəcək

Prezident İlham Əliyevin iyulun 16-da imzaladığı fərman Azərbaycanda daşınmaz əmlak obyektləri üzərində hüquqların rəsmiləşdirilməsi prosesini asanlaşdırır. Fərman nəticəsində təqribən 100 minə yaxın ailəyə əvvəllər sənədləşdirilməmiş ev və torpaq sahələrini hüquqi qeydiyyatdan keçirmək imkanı veriləcək.

Bu barədə Əmlak Məsələləri Dövlət Xidmətinin nəzdindəki Daşınmaz Əmlakın Dövlət Kadastrı və Reyestri publik hüquqi şəxsin İdarə Heyətinin sədri Nigar Alimova jurnalistlərə məlumat verib.

Onun sözlərinə görə, dəyişikliklər 2015-ci ildə qüvvəyə minmiş 439 nömrəli sənədə əlavə və düzəlişləri əhatə edir.

“Bu sənəd əslində amnistiya xarakteri daşıyır. Əvvəllər hüquqmüəyyənedici sənəd kimi tanınmayan bəzi arayışlara bu status verilir. Bu da vətəndaşlara əmlaklarını rəsmiləşdirmək imkanı yaradır”, – Alimova bildirib.

Yeni hüquqi çərçivə əsasında keçmiş kolxoz və sovxoz torpaqları, o cümlədən müxtəlif kənd təsərrüfatı müəssisələrinin əmrləri əsasında verilmiş sahələr də mülkiyyət hüququ ilə rəsmiləşdirilə biləcək. Fərmana əsasən, sovet dövründə yerli icra orqanları tərəfindən ayrılmış torpaq sahələrinin qeydiyyatı zamanı artıq dövlət aktının təqdim olunması tələb olunmayacaq.

Bundan əlavə, sovxoz rəhbərlərinin verdiyi əmr və ya torpaq kitablarından çıxarış kimi sənədlər də hüquqi əsas kimi qəbul ediləcək. Ekspertlər hesab edirlər ki, bu addım uzun illər hüquqi qeyri-müəyyənlik şəraitində qalan əmlakların statusunun aydınlaşdırılmasına və daşınmaz əmlak bazarının tənzimlənməsinə mühüm töhfə verəcək.

Prezidentin bu fərmanı "Daşınmaz əmlakın dövlət reyestri haqqında" qanuna edilən son dəyişikliklərlə uyğunlaşdırılıb və 2015-ci il 13 yanvar tarixli, eləcə də 30 oktyabr tarixli fərmanlarda nəzərdə tutulan sənədlər siyahısına düzəlişləri ehtiva edir.

Gülnar