İlin ilk yarısında 31 cinayət işinin istintaqı tamamlanıb

2025-ci ilin ilk altı ayı ərzində Baş Prokurorluğun İstintaq idarəsi tərəfindən 39 şəxsə qarşı aparılan 31 cinayət işinin ibtidai istintaqı başa çatdırılaraq məhkəməyə göndərilib. Onlardan ikisi qəsdən adam öldürmə faktları ilə bağlı olub. Bu barədə Baş Prokurorluqdan bildirilib. 

Prokurorluq üç nəfər barəsində qiyabi icraatla aparılan işləri də məhkəməyə göndərib.

Baş prokuror hesabat dövründə qeyri-aşkar cinayətlərin açılmasında daxili işlər orqanları ilə prokurorluq orqanları arasında koordinasiyalı əməkdaşlığın əhəmiyyətini vurğulayıb.

Bütün məhkəmə instansiyaları üzrə 11.170 şəxsə qarşı 10.046 iş üzrə dövlət ittihamı müdafiə olunub. Bu müddətdə prokurorluq orqanları tərəfindən 658 apellyasiya və 198 kassasiya protesti verilib, müvafiq olaraq 441 apellyasiya və 49 kassasiya protesti təmin olunub.

Tabe rayon və şəhər prokurorluqlarının fəaliyyətində də nəticələr müsbət olub. Adam öldürmə cinayətləri ötən ilin eyni dövrü ilə müqayisədə 21 hadisə azalaraq 54 fakt təşkil edib, onlardan 53-nün üstü açılıb. Bağlı qalmış bir cinayət hadisəsinin isə cari ilin iyul ayında açıldığı bildirilir.

Gülnar