Sumqayıtda 22 min abonentin qaz təchizatı müvəqqəti dayandırılacaq

“Azəriqaz” İstehsalat Birliyinin Sumqayıt Regional Qaz İstismar İdarəsi payız-qış mövsümünə hazırlıq çərçivəsində qaz xətlərində əsaslı təmir işləri aparır. Bu səbəbdən iyulun 25-də Sumqayıtın bəzi ərazilərində qaz təchizatı müvəqqəti olaraq dayandırılacaq.

Qazın verilişində fasilə saat 10:00-dan etibarən Sumqayıt şəhərinin 16-cı mikrorayonu, Corat qəsəbəsi, Corat və Novxanı bağları, həmçinin 52-ci məhəllə daxil olmaqla bir sıra əraziləri əhatə edəcək.

Qaz kəsintisi yeni siyirtmələrin quraşdırılması və balans qovşaqlarında aparılan əsaslı təmir işləri ilə əlaqədardır. “Azəriqaz” bildirir ki, bununla əlaqədar ümumilikdə 22 minə yaxın abonent təsirlənəcək.

Qurum vətəndaşlardan yaranacaq narahatlığa görə anlayış göstərmələrini xahiş edir və işlərin tamamlanmasının ardından qaz təchizatının dərhal bərpa olunacağını qeyd edir.