Azərbaycan və Vatikan dini əməkdaşlıq haqqında sənəd imzalayıb

Azərbaycan və Vatikan arasında dini və mədəni əməkdaşlığın gücləndirilməsi məqsədilə Anlaşma Memorandumu imzalanıb. Bu barədə Dövlət Dini Qurumlarla İş üzrə Komitə məlumat yayıb.

Sənəd Komitənin sədri Ramin Məmmədov və Vatikanın Dinlərarası Dialoq üzrə Dikasteriyasının prefekti kardinal Corc Ceykob Kuovakad tərəfindən imzalanıb. Tərəflər birgə tədbirlər keçirmək, təcrübə mübadiləsi aparmaq və dini təhsil sahəsində əməkdaşlığı inkişaf etdirmək barədə razılığa gəliblər.

Kardinal Kuovakad sənədi 2011-ci ildə imzalanmış “Azərbaycanda Katolik Kilsəsinin hüquqi statusu haqqında” sazişin davamı adlandırıb və bunun ölkədə dini azlıqlara hörmətin göstəricisi olduğunu bildirib. O, təşəbbüsə dəstəyə görə Prezident İlham Əliyevə təşəkkür edib.

Tədbirdə Azərbaycanın Müqəddəs Taxt-Tac yanında səfiri İlqar Muxtarov da iştirak edib.

N.Təbrizli