Azərbaycan Mərkəzi Bankı “PulPal” və “Mpay”ə icrası məcburi göstəriş verib

Azərbaycan Mərkəzi Bankı (AMB) “PulPal” MMC və “Mpay” QSC elektron pul təşkilatlarına qanunvericiliyin tələblərinin pozulması ilə bağlı icrası məcburi göstəriş verib. Bu barədə qurumun yaydığı rəsmi məlumatda bildirilir.

Yoxlamalar nəticəsində “PulPal”da daxili nəzarət funksiyasının təkmilləşdirilməsi, risklərin idarə edilməsi və kadr potensialının gücləndirilməsi sahəsində çatışmazlıqlar müəyyən olunub.

“Mpay” təşkilatında isə cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə, nağd pulla işin təşkili və daxili nəzarət sistemlərinin gücləndirilməsi sahələrində nöqsanlar aşkar edilib.

Göstərişlər “Mərkəzi Bank haqqında” və “Ödəniş xidmətləri və ödəniş sistemləri haqqında” qanunların müvafiq maddələrinə əsasən verilib.