İyulda 26 gün yağıntılı hava qeydə alınıb

Azərbaycan ərazisində iyul ayı ərzində bölgələr üzrə 26 gün yağıntılı hava müşahidə olunub. Bu barədə Milli Hidrometeorologiya Xidmətinin rəisi Nazim Mahmudov açıqlamasında bildirib.

Onun sözlərinə görə, yağıntılar əsasən ayın birinci ongünlüyündə qeydə alınıb, bir sıra bölgələrdə leysan xarakteri daşıyıb. Ən çox yağıntı Dağlıq Şirvan zonasına (Şamaxı – 25,6 mm), həmçinin Bakı və Abşeron yarımadasına (Bakı – 9,6 mm) düşüb.

İyulda küləkli günlərin sayı Bakıda və Abşeron yarımadasında 9, bölgələrdə isə 19 olub. Küləyin maksimal sürəti Bakıda 28 m/s, bölgələrdə isə 26 m/s-dək güclənib. Bu səbəbdən ay ərzində 5 dəfə sarı və narıncı xəbərdarlıqlar verilib.

Ayın ən yüksək temperaturu Bakıda və Abşeronda 39,1°C, bölgələrdə isə 41°C olub. Ən aşağı temperatur isə 2 iyulda Şahdağda 4,8°C, 10 iyulda isə Binədə 18,7°C qeydə alınıb.