Şəmkirdə qəza zamanı iştirak edən nəqliyyat vasitələrinin buraxılış sənədləri olmayıb - AYNA

Şəmkir ərazisində avqustun 7-də baş verən ağır yol-nəqliyyat hadisəsində iştirak edən hər iki nəqliyyat vasitəsinin daşımalara buraxılış vəsiqəsi və buraxılış kartı olmayıb. Bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) məlumat yayıb.

 99-GO-705 dövlət qeydiyyat nişanlı “Mercedes-Benz Sprinter” markalı mikroavtobus fərqlənmə nişanı, daşımalara buraxılış vəsiqəsi və buraxılış kartı olmadan sifarişli sərnişindaşıma həyata keçirib.

Bundan əlavə, 20-DL-094 dövlət qeydiyyat nişanlı KAMAZ markalı yük nəqliyyat vasitəsinin də analoji sənədləri olmayıb.

“Nəqliyyat vasitələri reysqabağı texniki müayinədən, sürücülər isə tibbi müayinədən keçməyib. Hadisənin səbəblərinin müəyyən edilməsi məqsədilə hüquq-mühafizə orqanları tərəfindən araşdırma aparılır,” – Agentliyin açıqlamasında qeyd olunub.

Hadisə Bakı-Qazax-Gürcüstan sərhədi avtomobil yolunun Şəmkir rayonu ərazisində baş verib. Bakıdan Qazax istiqamətində hərəkətdə olan mikroavtobus yük maşını ilə toqquşub. Qəza nəticəsində 7 nəfər həlak olub, bir neçə nəfər yaralanıb.