Azərbaycanda tələbə və doktorant təqaüdləri artırıldı, qərar bu gündən qüvvədədir

Prezidentin imzaladığı sərəncama əsasən, Azərbaycanda doktorantlara, ali, orta ixtisas və peşə təhsili müəssisələrində təhsil alan tələbələrə verilən təqaüdlərin məbləği artırılıb. Sərəncam bu gündən qüvvəyə minib.

İqtisadçı deputat Vüqar Bayramovun verdiyi məlumata görə, yeni artım çərçivəsində bəzi təqaüdlər 450 manata qədər yüksəldilib.

Təqaüd artımları həm təhsil alanların sosial müdafiəsini gücləndirmək, həm də ölkədə insan kapitalının inkişafını stimullaşdırmaq məqsədi daşıyır.

Deputat bildirib ki, bu addım 2025-ci ildə həyata keçirilən beşinci sosial paket çərçivəsində atılıb. Paket ümumilikdə 3 milyon vətəndaşı əhatə edir.

Bu məqsədlə dövlət büdcəsindən əlavə olaraq 1,4 milyard manat vəsait ayrılacaq. Ümumilikdə, bu il sosial istiqamətə 16,9 milyard manat büdcə vəsaiti nəzərdə tutulub.

Bayramov əlavə edib ki, gələcək mərhələlərdə yaşa görə müavinətlərin artırılması da gündəmdədir və bunun üçün fiskal qiymətləndirmələr aparılır.

Gülnar