Naxçıvanda gölməçə üzərində platforma aşıb - Ölənlər var

Naxçıvan Muxtar Respublikasının Şahbuz rayonunda yerləşən istirahət mərkəzlərindən birində baş verən hadisə nəticəsində üç nəfər ölüb, iki nəfər isə xəsarət alıb. Bu barədə Nuhcivan informasiya agentliyi məlumat yayıb. 

Hadisə Ayrınc kəndi ərazisində yerləşən gölməçə üzərindəki platformanın aşması nəticəsində qeydə alınıb. Nəticədə bir ailənin iki üzvü hadisə yerində həyatını itirib. Ailənin digər üzvü isə xəstəxanaya aparılarkən yolda vəfat edib.

Hadisədən sonra digər ailə üzvləri xəstəxanaya gedərkən avtomobil qəzasına düşüblər. Qəza nəticəsində Naxçıvan şəhər sakinləri – 1983-cü il təvəllüdlü Hüseynov Tural Əli oğlu və onun oğlu, 2007-ci il təvəllüdlü Hüseynov Nicat Tural oğlu müxtəlif dərəcəli bədən xəsarətləri alıblar. Onlar Naxçıvan Muxtar Respublika Xəstəxanasına yerləşdiriliblər.

Faktla bağlı araşdırma aparılır.