Tullantı sularını düzgün idarə etməyənlərə 12 500 manatadək cərimə tətbiq ediləcək

Tullantı sularının qanunvericiliyə uyğun şəkildə idarə edilməməsinə görə müəssisə və təşkilatlar 12 500 manatadək cərimələnə bilər. Bu barədə Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidməti məlumat yayıb.

Nazirlər Kabinetinin 2023-cü il 30 avqust tarixli qərarına əsasən, mərkəzləşdirilmiş kanalizasiya sistemi olmayan ərazilərdə yerləşən qeyri-yaşayış binalarında çirkab suları sukeçirməz qurğular vasitəsilə toplanmalı və texniki normativlərə uyğun idarə olunmalıdır.

Xidmətin məlumatına görə, xüsusilə sənaye müəssisələri tərəfindən tullantı sularının tərkibindəki zərərli maddələr səbəbindən bu tələblərə riayət olunması ətraf mühitin mühafizəsi baxımından böyük əhəmiyyət daşıyır.

Qanunvericiliyə əsasən:

Vəzifəli şəxslər 4 000 manatadək,

Hüquqi şəxslər isə 12 500 manatadək cərimə edilə bilər.

Bundan əlavə, tullantı suları nəticəsində su mənbələrinin əhəmiyyətli dərəcədə çirkləndirilməsi cinayət məsuliyyəti yarada bilər.

Agentlik su ehtiyatlarının qorunmasının yalnız hüquqi deyil, həm də mənəvi öhdəlik olduğunu vurğulayır və iqlim dəyişikliyi fonunda su qıtlığının artdığı bir dövrdə bütün qurumları mövcud tələblərə ciddi əməl etməyə çağırır.