Bakıda turizm şirkətləri vasitəsilə dələduzluq: 20-dən çox vətəndaş aldadılıb

Bakıda “JOY TOUR” və “JOY TRAVEL” turizm agentlikləri vasitəsilə vətəndaşların aldadılması ilə bağlı cinayət işi başlanıb. Bu barədə Baş Prokurorluq məlumat yayıb.

Məlumata görə, Xətai rayon prokurorluğuna daxil olan çoxsaylı müraciətlər əsasında aparılmış araşdırmalar nəticəsində şirkətlərin təsisçisi Rəşad İlyasovun vətəndaşlardan xarici ölkələrə tur paketləri və aviabiletlər satmaq adı ilə pul toplayaraq həmin vəsaitləri şəxsi məqsədlərlə istifadə etməsinə dair əsaslı şübhələr müəyyən edilib.

İddialara görə, 20-dən artıq şəxs bu sxem üzrə aldadılıb. Faktla bağlı Cinayət Məcəlləsinin 178.2.2, 178.2.4 və 308.1-ci maddələri ilə cinayət işi başlanıb. Rəşad İlyasov təqsirləndirilən şəxs qismində həbs edilib.

İbtidai istintaq çərçivəsində hər iki MMC-nin maliyyə-təsərrüfat fəaliyyəti üzrə kompleks auditor yoxlaması təyin olunub. Yoxlama Azərbaycan Respublikasının Auditorlar Palatası tərəfindən aparılır.

Prokurorluq, zərərçəkmiş vətəndaşları Xətai rayon prokurorluğuna müraciət etməyə çağırır.