ADB: Azərbaycanın iqtisadi artımı 2025 və 2026-cı illərdə zəifləyəcək

Asiya İnkişaf Bankı (ADB) 2025-ci ildə Azərbaycanda iqtisadi artımı 2,4 %, 2026-cı ildə isə 2 % səviyyəsində proqnozlaşdırır. Bu göstəricilər Bankın aprel proqnozu ilə müqayisədə müvafiq olaraq 1 və 1,3 faiz bəndi aşağıdır.

ADB-nin hesabatında bildirilir ki, 2025-ci ilin ilk yarısında karbohidrogen hasilatındakı azalma iqtisadi artım tempini zəiflətdi. Həmin dövrdə ümumi iqtisadi artım 1,5 % təşkil edib ki, bu da ötən ilin eyni dövründəki 4,3 %-lə müqayisədə əhəmiyyətli dərəcədə aşağıdır.

Sənaye istehsalı 2025-ci ilin ilk 6 ayında illik müqayisədə 0,5 % azalıb. Neft hasilatı 5,3 %, qaz hasilatı isə 0,4 % geriləyib. Eyni zamanda, qeyri-neft sektoru 3,9 % artım göstərib, tikinti sahəsi isə dövlət investisiyaları hesabına 8,5 % genişlənib.

Xidmət sektorunda artım tempi 6,1 %-dən 3,1 %-ə düşüb. Kənd təsərrüfatı sahəsində isə artım bir il əvvəlki 0,2 %-dən 1,4 %-ə yüksəlib.

ADB proqnozlaşdırır ki, iqtisadi artım 2026-cı ilin sonuna qədər mülayim templə davam edəcək.

Aytac