Dünyada halal iqtisadiyyatın həcmi 3 trilyon dolları keçib

Hazırda dünyada halal iqtisadiyyatın həcmi 3 trilyon ABŞ dollarına yaxındır və bu sahənin şəffaflıq prinsipləri əsasında inkişaf etdirilməsi həm iqtisadi, həm də sosial dəyərlərin möhkəmlənməsinə xidmət edir. Bunu Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Bakıda keçirilən Halal Biznes Forumundan çıxışı zamanı deyib. 

O bildirib ki, Bakıda keçirilən Halal Biznes Forumu 30-dan çox ölkənin nümayəndələrinin iştirakı ilə qlobal əməkdaşlığın güclənməsi və davamlı sahibkarlıq modellərinin təşviqi baxımından mühüm platformaya çevrilib.

“Bu əməkdaşlıq təkcə iqtisadi maraqlara deyil, həm də yeni iqtisadi fəlsəfələrin formalaşmasına xidmət edir. Halal ticarət – halal gələcək deməkdir,” –  Məmmədov vurğulayıb.

Tədbir iki gün davam edəcək və həm sərgi, həm də sektorlararası iclaslardan ibarət olacaq. Forum çərçivəsində halal məhsulların istehsalı, sertifikatlaşdırılması, logistika və maliyyələşmə mexanizmləri üzrə panel müzakirələr keçiriləcək.

Məmmədov vurğulayıb ki, əgər iqtisadi münasibətlərdə şəffaflığı qorusaq, cəmiyyətimiz də qazancımız da halal olar.

Azərbaycan son illərdə halal məhsulların istehsalı və ixracı sahəsində bir sıra hüquqi və institusional islahatlar həyata keçirib. Xüsusilə, Azərbaycan Qida Təhlükəsizliyi Agentliyi və Azərbaycan Qida Təhlükəsizliyi İnstitutu bu sahədə sertifikatlaşdırma və nəzarət funksiyalarını icra edir.

Gülnar Nazimqızı