KOSGEB rəhbəri: KOB-ların gücləndirilməsi qlobal rəqabətə tab gətirmək üçün əsas şərtdir

Kiçik və orta bizneslərin (KOB) gücləndirilməsi və onların qlobal rəqabətə davamlı hala gətirilməsi təşkilatın əsas prioritetlərindəndir. Bunu Bakıda keçirilən Halal Biznes Forumunda çıxışı zamanı Türkiyənin Kiçik və Orta Müəssisələrin İnkişafı Təşkilatının (KOSGEB) rəhbəri Ahmet Serdar İbrahimcioğlu bildirib. 

“Sahibkarlığın dəstəklənməsi, KOB-ların böyüməsi və beynəlxalq bazarlarda dayanıqlı mövqe tutması qlobal iqtisadi sistemdə iştirak üçün əsas şərtlərdəndir,” –  İbrahimcioğlu qeyd edib.

İbrahimcioğlunun sözlərinə görə, KOSGEB bu günə qədər 76 ölkə ilə 110 əməkdaşlıq protokolu imzalayıb ki, bunlardan 26-sı İslam Əməkdaşlıq Təşkilatına (İƏT) üzv ölkələrlə bağlanıb.

“İƏT KOB-ların inkişafı üçün geniş əməkdaşlıq imkanları yaradır. Biz də öz proqramlarımızı daim İƏT mexanizmləri ilə uyğunlaşdırırıq,” –  o əlavə edib.

KOSGEB sədri qeyd edib ki, mövcud layihələrdə əsas məqsədlərdən biri İslam dünyasında iqtisadi əməkdaşlığın dərinləşdirilməsi və ortaq inkişaf modellərinin qurulmasıdır.

“Bu sahədə topladığımız təcrübəni bölüşməyə hazırıq. KOB-ların gücləndirilməsi həm regional, həm də qlobal səviyyədə iqtisadi dayanıqlığa xidmət edir,” – İbrahimcioğlu vurğulayıb.
KOSGEB rəhbəri: KOB-ların gücləndirilməsi qlobal rəqabətə tab gətirmək üçün əsas şərtdir

Gülnar Nazimqızı