Dünyada 100 minlərlə insan itkin düşüb — ICMP rəhbəri

Dünyada silahlı münaqişələr, iqlim dəyişikliyi və miqrasiya səbəbindən 1946-cı ildən bəri ən yüksək sayda insan — yüz minlərlə nəfər — itkin düşüb, deyə İtkin düşmüş şəxslər üzrə Beynəlxalq Komissiyanın (ICMP) Baş direktoru Katrin Bomberger bildirib.

Onun sözlərinə görə, təkcə Avropada 70 mindən çox miqrant, Ukraynada 100 mindən artıq, Suriyada 200 mindən çox, Meksika və Kolumbiyada isə hər birində 100 mindən artıq insan itkin düşüb. “Bu, qlobal miqyasda kollektiv cavab tələb edən humanitar böhrandır,” — Bomberger vurğulayıb.

O qeyd edib ki, itkinlərin taleyinin müəyyən edilməsində əsas amil dövlətlər, ailələr və beynəlxalq qurumlar arasında əməkdaşlıqdır. Bomberger Azərbaycanın bu istiqamətdə fəaliyyətini yüksək qiymətləndirib və Dövlət Komissiyasının rəhbəri Əli Nağıyevə təşəkkür edib. O, həmçinin Azərbaycan və Ermənistan arasında sülh sazişinin layihəsinə “itkinlər üzrə istintaq” müddəasının daxil edilməsini “müasir və cəsarətli addım” adlandırıb.

N.Tebrizli