DİN Osman Gündüzün bank kartlarındakı oğurluqla bağlı sualına cavab verib

Ölkədə bank kartlarından vəsait oğurluğu halları son dövrdə 80%-ə qədər azalıb. Bunu Azərbaycan Daxili İşlər Nazirliyinin Kibercinayətkarlıqla Mübarizə Baş İdarəsinin şöbə rəisi Yusif Hüseynov deyib.

Azərbaycan İnternet Forumunun prezidenti və İKT sahəsində ekspert Osman Gündüzün   “nə baş verdi ki, vətəndaşların kartlarından vəsait oğurlanması ilə bağlı açıqlamalar dayandırıldı?” sualına cavab olaraq DİN-in Kibercinayətkarlıqla Mübarizə Baş İdarəsinin şöbə rəisi Yusif Hüseynov cavabında deyib  ki, cinayətlərin araşdırılması üçün mərkəzi bankla birgə işçi qrupu yaradılıb və müvafiq tələblər tətbiq olunub.

Onun sözlərinə görə, əvvəllər kredit götürmə əməliyyatları bir neçə saniyə ərzində baş verirdi, lakin görülən tədbirlər nəticəsində oğurluq halları əhəmiyyətli dərəcədə azalıb.

Daxili İşlər Nazirliyinin son statistikasına görə, bu ilin ilk dörd ayı ərzində vətəndaşların kartından 6 milyon manatdan çox pul oğurlanıb. 

2024-cü ildə kart fırıldaqçılığı nəticəsində vətəndaşlara 22 milyon manatdan çox zərər dəyib.

Gülnar Nazimqızı