Bakıda gömrükçü öz mağazasında öldürülüb

Oktyabrın 11-də günorta saatlarında Bakı şəhərinin Suraxanı rayonu, Əmircan qəsəbəsində baş verən bıçaqlanma hadisəsi nəticəsində 43 yaşlı kişi həyatını itirib. Bu barədə Qafqazinfo məlumat yayıb.

Qətlə yetirilən şəxs Dövlət Gömrük Komitəsinin Hava Nəqliyyatında Baş Gömrük İdarəsinin əməkdaşı, 1982-ci il təvəllüdlü Ayxan Fəxrəddin oğlu Mustafayev olub. Hadisənin onun özünə məxsus mağazada baş verdiyi bildirilir.

Zərərçəkmiş xəstəxanaya çatdırılsa da, həyatını xilas etmək mümkün olmayıb.

Hüquq-mühafizə orqanları tərəfindən aparılan ilkin araşdırmalar nəticəsində 2009-cu il təvəllüdlü R.Xəlilov hadisəni törətməkdə şübhəli şəxs qismində saxlanılıb. Faktla bağlı cinayət işi başlanıb, istintaq davam etdirilir.