Agentlik müasir peşələri tədris proqramına daxil edib - Sadiq Əliyev

Dövlət Məşğullu Agentliyi əmək bazarının tələblərinə uyğun sistemli tədbirlər həyata keçirilir və bu istiqamətdə özəl sektorla əməkdaşlıq gücləndirilir. Bu barədə Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin İdarə Heyətinin sədri Sadiq Əliyev Bakıda keçirilən "Azərbaycanın Dayanıqlı İnkişaf Naminə Təhsilə İnvestisiya" mövzusunda 7-ci DİM dialoqu forumunda bildirib.

Əliyevin sözlərinə görə, Agentlik rəqabət qabiliyyətli və daim yenilənən fəaliyyət modeli üzərində işləyir.

“Biz artıq peşə təhsilini müasir əmək bazarının çağırışlarına uyğunlaşdırmışıq. Ənənəvi ixtisaslarla yanaşı, data analitika və kibertəhlükəsizlik kimi müasir istiqamətlər də peşə tədris proqramlarımıza daxil edilib,” – o vurğulayıb.

Sədr qeyd edib ki, peşə hazırlığı proqramları Qarabağ bölgəsində də davam etdirilir və bu, bölgənin sosial-iqtisadi reinteqrasiyasına töhfə verir.

“Təhsilə yatırılan hər bir investisiya gələcəyə yönələn sərmayədir,” –  Əliyev əlavə edib.

Son illərdə Dövlət Məşğulluq Agentliyi peşə təhsilinin inkişafı, gənclərin əmək bazarına inteqrasiyası və yeni texnologiyalara uyğun kadr hazırlığı sahəsində bir sıra layihələr icra edib. 2024-cü ildən etibarən kibertəhlükəsizlik və data analitika kimi ixtisaslar peşə təhsil proqramlarına daxil edilib. Qarabağ bölgəsində də peşə tədris mərkəzlərinin yaradılması işğaldan azad edilmiş ərazilərdə məşğulluq imkanlarını artırmağı hədəfləyir.

Gülnar Nazimqızı