“Böyük Qayıdış” proqramı çərçivəsində 6 mindən çox şəxs məşğulluqla təmin olunub

İşğaldan azad edilmiş ərazilərdə “Böyük Qayıdış” Dövlət Proqramı uğurla həyata keçirilir və 6 mindən çox insanın məşğulluğu təmin olunub. Bunu əmək və əhalinin sosial müdafiəsi naziri Anar Əliyev "PeşəFest"in yekun tədbirində deyib.

Onun sözlərinə görə, proqram çərçivəsində keçmiş məcburi köçkünlərin doğma torpaqlara qayıdışı ilə yanaşı, onların məşğulluğunun dəstəklənməsi, dayanıqlı yaşayış və iqtisadi mühitin yaradılması istiqamətində geniş tədbirlər görülür.

“Azad olunmuş ərazilərdə yeni sənaye zonaları və istehsal sahələri fəaliyyətə başlayıb, aktiv məşğulluq proqramlarının tətbiqi genişləndirilib,” – Əliyev deyib.

Nazir qeyd edib ki, həmin ərazilərdə iqtisadi fəal əhalidən 6 108 nəfərin məşğulluğu təmin edilib. Onlardan 4 533 nəfəri daimi işlə, 475 nəfəri özünüməşğulluq proqramı ilə, 289 nəfəri isə peşə hazırlığı kursları vasitəsilə təmin olunub.

Gülnar Nazimqızı