17 yaşlı yeniyetmə taxta udub

2008-ci il təvəllüdlü yeniyetmə qarın ağrısı və qusma şikayətləri ilə Kliniki Tibbi Mərkəzin Təcili və Təxirəsalınmaz Tibbi Yardım şöbəsinə yerləşdirilib. Müayinə nəticəsində xəstəyə peritonit diaqnozu qoyulub və təxirəsalınmaz cərrahi əməliyyat aparılıb. 

Mərkəzin məlumatına görə, əməliyyat Uşaq cərrahiyyəsi şöbəsinin müdiri İlqar Haqverdiyev və uşaq cərrahı Günay Əmrahlı tərəfindən icra olunub. Həkimlər nazik bağırsağın bir hissəsini çıxarıb və yoğun bağırsaqdakı defekti tikiblər.

Əməliyyat zamanı iliosekal küncdən təxminən 70–80 sm məsafədə nazik bağırsaqda iki perforasiya (deşici zədələnmə) aşkar edilib. Zədələnməyə bağırsaq mənfəzində yerləşən iti və sərt yad cisim — taxta parçası səbəb olub. Həkimlər həmçinin yoğun bağırsaqda əlavə perforativ dəlik və bağırsaq boyunca müxtəlif ölçülü sərt yad cisimlər müəyyən ediblər.

Məlumata görə, əməliyyat uğurla nəticələnib. Xəstə səkkiz günlük stasionar müalicədən sonra vəziyyəti kafi qiymətləndirilməklə ambulator müalicəyə buraxılıb.

Uşaqlarda yad cisimlərin udulması halları nadir olsa da, ciddi fəsadlara — bağırsaq deşilməsi və peritonitə — səbəb ola bilər. Həkimlər belə hallarda valideynləri uşaqların təhlükəli predmetlərlə təmasından qorumağa çağırır.