Azərbaycanda dənli və dənli paxlalı bitkilərin istehsalı 3,5 milyon tona çatacaq

Azərbaycanın kənd, meşə və balıqçılıq təsərrüfatı üzrə 2026-cı il proqnozlarına əsasən, ölkədə dənli və dənli paxlalı bitkilərin istehsalı 3 milyon 533,9 min tona çatacaq. Bu, 2025-ci ilin proqnozu (3 milyon 430,9 min ton) ilə müqayisədə təxminən 3 faiz çoxdur. Bu, “Azərbaycan Respublikasının 2026-cı il dövlət büdcəsi haqqında” qanun layihəsində öz əksini tapıb.

Buğda istehsalı 2026-cı ildə 1 milyon 776,5 min ton, çəltik istehsalı isə 20,3 min ton səviyyəsində gözlənilir.

Tərəvəz istehsalının 1 milyon 955,2 min ton, kartof istehsalının isə 1 milyon 153 min ton olacağı proqnozlaşdırılır.

Eyni zamanda, pambıq istehsalının 316,7 min ton, meyvə və giləmeyvə istehsalının isə 1 milyon 639,5 min tona qədər artacağı bildirilir.

Üzüm istehsalı 217 min ton, tütün 6,7 min ton, şəkər çuğunduru 324,9 min ton səviyyəsində proqnozlaşdırılır.

 2026-cı il üçün kənd təsərrüfatında əlavə dəyərin 9,9 milyard manata çatacağı və sektorun ÜDM-də payının 6,2 faiz olacağı gözlənilir.

Gülnar Nazimqızı