ƏƏSMN-nin xidmətlərinin 90 faizdən çoxu elektronlaşdırılıb

Əmək və Əhalinin Sosial Müdafiəsi nazirliyinin təqdim etdiyi xidmətlərin 90 faizdən çoxu elektron formada göstərilir. Bunu Əmək və Əhalinin Sosial Müdafiə Naziri Anar Əliyev deyib.

Nazir bildirib ki, reabilitasiya sahələrində də elektronlaşdırmanı tam şəkildə həyata keçirilib.

"Dövlət idarəçiliyində rəqəmsal sistemlərin tətbiqi və şəffaflığın təmin olunması sosial sahədə aparılan islahatların əsas istiqamətlərindən biridir. Bu sistemlərin dövlət idarəçiliyinə gətirilməsi və bu vasitə ilə şəffaflığın təmin olunması bizim birinci istiqamətimiz idi,” - nazir vurğulayıb.

Rəsminin sözlərinə görə, bu gün Əmək və Əhalinin Sosial Müdafiəsi Nazirliyinin fəaliyyət sahələrində tam elektron keçid təmin olunub.

“Əmək münasibətləri, məşğulluq, sosial müdafiə və reabilitasiya sahələrində biz elektronlaşdırmanı tam şəkildə həyata keçirmişik. Artıq Nazirliyin təqdim etdiyi xidmətlərin 90 faizdən çoxu elektron formada göstərilir,” – deyə o vurğulayıb.

Sonda o vurğulayıb ki, gələcək mərhələlərdə bu proses rehabilitasiya, əlillərin sosial müdafiəsi və psixoloji dəstək xidmətləri kimi sahələri də əhatə edəcək və süni intellekt əsaslı sistemlərin tətbiqi vətəndaş məmnunluğunun daha da artırılmasına xidmət edəcək.

Aytac Zeynalova