Deputat: Qəhvəyi məxmər bağacığı Zaqatalada kənd təsərrüfatına ciddi zərər vurur

Qəhvəyi məxmər bağacığı adlı zərərverici Zaqatala rayonunda kənd təsərrüfatına ciddi ziyan vurur. Bunu deputat Asif Əsgərov oktyabrın 24-də Milli Məclisdə çxışı zamanı bildirib.

Onun sözlərinə görə, bu zərərverici meyvə-tərəvəz, fındıq, çay və qarğıdalı sahələrində məhsuldarlığın azalmasına və məhsulun keyfiyyətinin pisləşməsinə səbəb olub.

Əsgərov qeyd edib ki, fındıqçılıq və meyvəçilik Zaqatalanın əsas gəlir mənbələrindəndir və fındıq istehsalı Azərbaycanın ixrac potensialına görə strateji əhəmiyyət daşıyır. Deputat vurğulayıb ki, kənd təsərrüfatında yaranmış bu vəziyyət qeyri-neft sektoruna da mənfi təsir göstərir.

Onun sözlərinə görə, qəhvəyi məxmər bağacığı yalnız kənd təsərrüfatına deyil, həm də insanların gündəlik həyatına mənfi təsir edir.

“Böcəklərin evlərə dolması yerli sakinlər arasında narahatlıq yaradıb”, — əlavə edib.

O, həmçinin bu zərərvericinin ekoloji balans üçün təhlükə yaratdığını, 300-dən artıq bitki növü ilə qidalandığını və onlardan təxminən 100-nün Azərbaycan florasında mövcud olduğunu qeyd edib.

Qəhvəyi məxmər bağacığı (Halyomorpha halys) son illərdə Qafqaz regionunda sürətlə yayılaraq kənd təsərrüfatı məhsullarına ciddi zərər vurur. Bu zərərverici ilk dəfə 2017-ci ildə Azərbaycanın qərb bölgələrində müşahidə olunub və o vaxtdan etibarən geniş ərazilərə yayılıb.

Gülnar Nazimqızı