Audiovizual Şura MTV kanalı üçün məhkəməyə müraciət edib

Audiovizual Şura oktyabrın 22-də yayımlanan “Toya gəlmişik” proqramında qohumlararası nikahla bağlı toy məclisinin nümayiş etdirilməsi səbəbindən MTV kanalına inzibati protokol tərtib edərək cərimə tətbiqi üçün məhkəməyə müraciət edib.

Şura bildirib ki, kanalın efirində saat 20:31–21:24 arası yayımlanan proqram “Uşaqların zərərli informasiyadan qorunması haqqında” Qanunun 9.3-cü maddəsini pozub. Həmin pozuntu toyda xalaoğlu və xalaqızı arasında qohum nikahının nümayiş etdirilməsi ilə bağlıdır.

Bir neçə gün əvvəl digər yayımçı tərəfindən eyni qaydaya zidd pozuntu baş vermiş və həmin yayımçıya xəbərdarlıq olunmuşdu. Audiovizual Şura oktyabrın 24-də “MTV” kanalının aid olduğu “MUZ TV Azərbaycan” MMC-nin səlahiyyətli nümayəndəsini iclasa dəvət edərək inzibati protokol tərtib edib və pozuntu faktını müvafiq məhkəməyə göndərib.

İnzibati Xətalar Məcəlləsinin 388-2.0.4-cü maddəsinə əsasən, hüquqi şəxslər bu pozuntuya görə 3 000–4 000 manat məbləğində cərimə oluna bilərlər.

Aytac