Deputat Şəkidə 4-cü məktəbi tikdirir

Deputat Cavanşir Feyziyev Şəkidə Böyük Dəhnə kəndində yerləşən 2 saylı tam orta məktəbin 3 mərtəbədən ibarət olacaq yeni korpusunu tikdirir. Bu barədə deputat anews.az-a açıqlamasında bildirilib. 

Bir gün əvvəl Yeniavaz saytı məlumat paylaşaraq bildirilib ki, Şəki Şəhər İcra Hakimiyyəti Böyük Dəhnə kəndində yerləşən 2 saylı tam orta məktəbin yeni korpusunun tikintisi üçün icazə verib. Sayt yazır ki, Şəki şəhəri, Böyük Dəhnə kəndindəki 2 saylı tam orta məktəbin yeni korpusunun sifarişçisi millət vəkili Cavanşir Əyyub oğlu Feyziyevdir.

"Bəli, doğrudur. Bu mənim tikdirdiyim 4- cü məktəbdir", - deputat bildirib. 

Deputat anews.az-a açıqlamasında bildirib ki, bundan əvvəl Şəkidə onun sifarişi ilə 3 məktəb də tikilib istifadəyə verilib. 

"2006-ci ildə Böyük Dəhnə kəndində yerləşən 2 saylı tam orta məktəbin indiki binası, 2010-cu ildə Çay Qaraqoyunlu kəndində tikilən ibtidai sinif məktəbi, üçüncüsü isə Şəkidə sahəsi 4000 kv.m-ə yaxın Məktəbəqədət Təhsil Müəssisəsi mənim tikdirdiyim məktəblərdir", - deputat əlavə edib. 

Böyük Dəhnə kəndindəki 2 saylı tam orta məktəb Elm və Təhsil Nazirliyinin Şəki-Zaqatala Regional Təhsil İdarəsinə tabedir. 

Məsələ ilə bağlı regional təhsil idarəsinə sorğu ünvanlasaq da hələlik sorğuya cavab ala bilmədik. 

Cavanşir Feyziyev 2006-ci ildə iş adamı kimi fəaliyyət göstərib,  2015-ci ildən isə Milli Məclisin deputatıdır. 

Gülnar Nazimqızı