Prezident Sabirabadda 2 müəssisədə olub

Azərbaycan Prezidenti İlham Əliyev bu gün Sabirabad Sənaye Məhəlləsində “Humix” MMC-nin aqrokimyəvi vasitələr və “Azera Toxumçuluq” MMC-nin toxum istehsalı müəssisələrinin fəaliyyətilə tanış olub. 

“Humix” MMC 2021-ci ildə Sabirabad Sənaye Məhəlləsinin rezidenti statusu alıb. Müəssisədə orqanik mineral (toz), kimyəvi (maye və toz) və qranul gübrələr istehsal olunur. Türkiyə, Çin və yerli texnologiyaları əsasında fəaliyyət göstərən müəssisənin illik istehsal gücü 18 min ton gübrə, daimi işçilərin sayı isə 16 nəfərdir. Məhsul daxili bazarın tələbatını ödəməklə yanaşı, ixrac üçün də nəzərdə tutulub. Müəssisənin ümumi investisiya məbləği 1,45 milyon manat, onun 497 min manatı Azərbaycan Biznesinin İnkişafı Fondu tərəfindən güzəştli kredit şəklində ayrılıb.

“Azera Toxumçuluq” MMC də 2021-ci ildə Sənaye Məhəlləsinin rezidenti kimi qeydiyyata alınıb. Burada Türkiyənin qabaqcıl texnologiyaları əsasında standart və hibrid toxum istehsalı müəssisəsi qurulub.

Layihənin dəyəri 2,5 milyon manat, müəssisədə daimi iş yerlərinin sayı 20 nəfər, işçilər Sabirabad və ətraf rayonlardan cəlb ediləcək. Müəssisədə Sabirabad Pilot Aqropark və region fermer təsərrüfatlarından xammal istifadə olunur.