Prezident alimlərlə bağlı göstəriş verib

Prezident İlham Əliyev dövlət qurumlarına Azərbaycan alimləri ilə əməkdaşlığın gücləndirilməsi barədə göstəriş verib. Bu barədə Prezident İlham Əliyev Azərbaycan Milli Elmlər Akademiyasının 80 illik yubiley yığıncağında çıxışı zamanı söyləyib.

O bildirib ki, ölkədə elmin iqtisadiyyat və sənaye ilə sıx bağlılığı təmin olunmalıdır.

“Mən bütövlükdə bildirmək istəyirəm ki, elm iqtisadiyyatla, sənaye ilə sıx bağlı olmalıdır. Burada bu kürsüdən dövlət strukturlarına da göstəriş vermək istəyirəm ki, Azərbaycan alimləri ilə daha sıx işləsinlər,” — dövlət başçısı vurğulayıb.

Prezidentin sözlərinə görə, Azərbaycan elminin praktik nəticələr verməsi vacibdir və bu nəticələr yalnız elmi əsərlərdə deyil, real iqtisadi proseslərdə özünü göstərməlidir.

“Elmimizin praktik nəticələri olmalıdır. Təkcə elmi əsərlərdə yox, həyatda və iqtisadiyyatın sürətli inkişafını nəzərə alaraq,” — o əlavə edib.

Əliyev qeyd edib ki, elmlə iqtisadiyyat arasında əlaqələndirmə və uzlaşma yüksək səviyyədə təşkil olunmalıdır: “Əminəm ki, bu sözlərdən sonra bizim dövlət qurumlarımız Azərbaycan alimləri ilə daha fəal işləyəcəklər", - Prezident deyib. 

Gülnar Nazimqızı