Səməd Bəşirli: Qeyri-neft sektorunun artımı strateji hədəfləri üstələyir

 Makroiqtisadi sabitlik Azərbaycanın dayanıqlı inkişafının əsas göstəricilərindən biridir və bu sabitlik maliyyə nizam-intizamının qorunmasına, inflyasiyanın idarə olunmasına və investisiya mühitinin yaxşılaşmasına imkan yaradır. Bunu iqtisadiyyat nazirinin müavini Səməd Bəşirli Milli Məclisdə çıxışı zamanı bildirib.

Onun sözlərinə görə, formalaşmış əlverişli iqtisadi mühit qeyri-neft sektorunun genişlənməsini, həmçinin iqtisadi artımın sosial rifahla uzlaşdırılmasını təmin edir.

Bəşirli qeyd edib ki, 2022–2025-ci illərdə qeyri-neft-qaz sektorunda ÜDM-in orta illik artımı 6,1% səviyyəsində gözlənilir ki, bu da “Azərbaycan 2030” strategiyasında müəyyən olunmuş hədəfdən yüksəkdir.

Nazir müavini vurğulayıb ki, ölkədə ÜDM artımının tamamilə qeyri-neft-qaz sektorunun hesabına formalaşması, iqtisadiyyatın şaxələndirilməsi və özəl sektorun güclənməsi istiqamətində mühüm nəticədir.

Bəşirli əlavə edib ki, şaxələndirmə tədbirlərinin iqtisadi artıma təsiri yaxın illərdə daha aydın hiss olunacaq və bu proses uzunmüddətli dayanıqlı inkişafı dəstəkləyəcək.

Gülnar Nazimqızı