Azərbaycanda 423 min nəfər diabet xəstəsi var

Azərbaycanda 423 523 nəfər şəkərli diabet xəstəsi qeydiyyatdadır. Onlardan 39 211 nəfər insulinlə müalicə olunan, 384 312 nəfər isə insulinlə təmin edilməyən xəstələrdir. Bu barədə Azərtac məlumat yayıb. 

2024-cü il ölkədə 33 533 nəfərə ilk dəfə şəkərli diabet diaqnozu qoyulub. 

1991-ci ildən etibarən noyabrın 14-ü Ümumdünya Diabetlə Mübarizə Günü kimi qeyd olunur.

2007-ci ildən bu gün BMT-nin himayəsi altında keçirilir. 2006-cı ildə BMT Baş Assambleyası şəkərli diabetlə bağlı qətnamə qəbul edərək ictimaiyyəti xəstəliyin səbəbləri, əlamətləri, fəsadları, müalicəsi və profilaktikası barədə məlumatlandırmağı prioritet elan edib. 

Şəkərli diabet, orqanizmdə bəzi mübadilə proseslərinin pozulması nəticəsində qanda şəkərin normadan artıq və ya az olması ilə xarakterizə olunur. Xəstəlik dünya miqyasında ateroskleroz və xərçənglə yanaşı, ən çox əlilliyə və ölümə səbəb olan ilk üç xəstəlikdən biridir. 1980-ci ildə dünya üzrə 108 milyon nəfər diabetdən əziyyət çəkirdisə, bu rəqəm hazırda 589 milyon nəfərə çatıb.

Diabetin əsas risk qrupuna 24-60 yaş arası insanlar daxildir. Azərbaycanda xəstəliyin əsas səbəbləri azhərəkətli həyat tərzi, qeyri-düzgün qidalanma və artıq çəkidir.

Aytac