Bakı Metropoliteni məsləhət almaq üçün 600 min manata yaxın pul xərcləyəcək

Bakı Metropoliteni” QSC dünyanın aparıcı metro operatorlarından biri olan “Metro İstanbul” ilə yeni metro xətlərinin inkişafı üzrə məsləhət xidmətlərinin göstərilməsinə dair müqavilə imzalayıb. Bu barədə Bakı Metropoliteni” QSC məlumat yayıb.

 Müqavilənin dəyəri 586 500 AZN təşkil edir və 2025–2030-cu illəri əhatə edən Dövlət Proqramı çərçivəsində həyata keçiriləcək genişləndirmə layihələrini əhatə edir.

“Metro İstanbul” mühəndislik və texnoloji həllərin qiymətləndirilməsi, istismar modellərinin təhlili, ətraf mühit və sosial təsirlərin qiymətləndirilməsi, həmçinin beynəlxalq maliyyə institutları üçün nəzərdə tutulan maliyyə və kommersiya şərtlərinin təhlili üzrə xidmət göstərəcək.

Azərbaycan hökuməti metro infrastrukturunun genişləndirilməsi layihələrinin beynəlxalq standartlara uyğun hazırlanması üçün Asiya İnfrastruktur İnvestisiya Bankı (AIIB) və Asiya İnkişaf Bankı (ADB) ilə maliyyələşdirmə danışıqları aparır. Bu çərçivədə sənədlərin müstəqil və təcrübəli ekspertlər tərəfindən qiymətləndirilməsi tələb olunur.
Türkiyənin “Metro İstanbul” şirkəti hazırda 241 km uzunluğunda metro şəbəkəsində 18 xətt üzrə 236 stansiya idarə edir və regionun ən böyük metro operatorlarından biri hesab olunur.