Dəyişiliklər vergi sisteminin təkmilləşdirilməsinə yönəlib - Deputat/Video

Son günlər büdcə layihə ilə bağlı cəmiyyətdə "yanlış təfsirlər" səsləndirilir, halbuki dəyişikliklər vergi sisteminin təkmilləşdirilməsinə və sahibkarların vergi yükünün azaldılmasına yönəlib. Bunu Milli Məclisin deputatı Bəhruz Məhərrəmov deyib.

Məhərrəmov qeyd edib ki, təklif olunan dəyişikliklərlə bir sıra fəaliyyət növlərinin vergidən azad edilməsi, fiziki şəxslərin xaricdən əldə etdikləri dividendlərə tətbiq olunan vergi dərəcəsinin azaldılması və media sahəsinə vergi güzəştlərinin daha üç il müddətinə uzadılması nəzərdə tutulur.

Deputatın sözlərinə görə, dəyişikliklər konstitusiyada təsbit olunmuş ədalətli vergi prinsiplərinə uyğun olaraq vergi nəzarətinin gücləndirilməsini və kölgə iqtisadiyyatına qarşı mübarizəni hədəfləyir.

O, həmçinin vergi islahatları ətrafında tənqidi mövqe sərgiləyən qrupların "ictimai rəyi çaşdırmağa çalışdığını" iddia edərək bildirib ki, bu təşəbbüslər dövlət və vətəndaş maraqlarının uzlaşdırılmasına xidmət edir.

Gülnar Nazimqızı