Vergi dəyişilikləri kölgə iqtisadiyyatının həcminin azalmasına səbəb olacaq/Video

Vergi Məcəlləsinə təklif olunan dəyişikliklər Azərbaycanın post-qələbə dövründə iqtisadiyyatın şaxələndirilməsi və kölgə iqtisadiyyatının həcminin azaldılması məqsədlərinə uyğundur. Bunu parlament müzakirələri zamanı deputat Zahid Oruc bildirib.

Zahid Orucun sözlərinə görə, qlobal ticarət mühitində artan tarif siyasətləri iqtisadi rəqabətin hərbi vasitələrlə deyil, ticarət və gömrük qaydaları üzərindən aparıldığını göstərir. O bildirib ki, Azərbaycan üçün neft hasilatının azalması fonunda qeyri-neft-qaz sektorunun genişləndirilməsi prioritet olaraq qalır.

Deputat Gürcüstanda 2003-cü ildən sonra aparılmış vergi islahatlarını xatırladaraq kölgə iqtisadiyyatının məhdudlaşdırılmasının biznes mühitini canlandırdığına diqqət çəkib. O qeyd edib ki, Azərbaycan sahibkarlarının Gürcüstana 3,5 milyard dollar kapital yatırması həmin mühitin üstünlüklərini göstərir və oxşar şəraitin ölkə daxilində yaradılması vacibdir.

Deputara görə, xaricdən ölkəyə kapital gətirənlər üçün dividend vergisinin 14%-dən 5%-ə endirilməsi və sadələşdirilmiş vergi mexanizminin 200 min manatdan 400 min manata qaldırılması sahibkarların leqallaşmasını və vergi bazasının genişlənməsini stimullaşdıracaq.

Deputat əlavə edib ki, rusumsuz ticarət mağazalarında mallar üzrə ƏDV və aksizlərin sıfırlanması qiymətlərin aşağı düşməsinə səbəb ola bilər.

Müzakirələr zamanı Oruc Naxçıvan Muxtar Respublikası üçün nəzərdə tutulan yeni vergi və maliyyə rejiminə də toxunub. O bildirib ki, azad edilmiş ərazilərdə tətbiq olunan vergi güzəştlərinin Naxçıvana şamil edilməsi regionun Türkiyə ilə sərhəd boyunca ticarət baxımından strateji məkana çevrilməsinə töhfə verəcək.

Deputat Hesablama Palatasının qeyri-dövlət obyektlərinin yalnız 30%-nin icarəyə verilməsi ilə bağlı rəyini də xatırladaraq, bu sahədə genişləndirilmiş güzəştlərin iqtisadi aktivliyi artıra biləcəyini qeyd edib.

Orucun sözlərinə görə, qarşıdakı mərhələdə sahibkarların stimullaşdırılması və kölgə iqtisadiyyatının həcminin minimuma endirilməsi iqtisadi modelin möhkəmlənməsi üçün əsas istiqamətlər olaraq qalacaq.

Gülnar Nazimqızı