Sosial şəbəkələrdə qeyri etik paylaşımlara görə cərimə və cəzalar gözlənilir

Azərbaycan sosial şəbəkələrdə qeyri-etik paylaşımlar və cəmiyyətə hörmətsizlik kimi qiymətləndirilən davranışlara görə 500–1 000 manat cərimə və 30 günədək inzibati həbs tətbiq olunmasını nəzərdə tutan yeni dəyişiklikləri müzakirə edir.

Təklif İnzibati Xətalar Məcəlləsinin “xırda xuliqanlıq” maddəsinə əlavə hissələrin daxil edilməsini nəzərdə tutur.

Milli Məclisin Hüquq siyasəti və dövlət quruculuğu və İnsan hüquqları komitələrinin birgə iclasında təqdim olunan layihəyə əsasən, internetdə ictimai mənəviyyatı təhqir edən ifadə, jest və ya görüntülərə görə inzibati tənbeh veriləcək.

Təkrar hallar üçün sanksiyalar sərtləşdirilir: pozuntu əvvəlki cərimədən 1 il ərzində təkrar edilərsə, cərimə 1 000–2 000 manat olacaq, zəruri hallarda bir aydan iki ayadək inzibati həbs tətbiq ediləcək.

Dəyişikliyə əlavə olunan qeydə əsasən, bu maddələr yalnız həmin əməllər Cinayət Məcəlləsi ilə cinayət məsuliyyətinə səbəb olmadığı halda tətbiq ediləcək.

Gülnar Nazimqızı