63 özəl bağça qrant müsabiqəsinin qalibi olub

2025–2026-cı tədris ili üçün keçirilən qrant müsabiqəsində 63 özəl məktəbəqədər təhsil müəssisəsi qalib olub. Bu barədə Elm və Təhsil Nazirliyi məlumat yayıb. 

Proqramın məqsədi dövlət bağçalarına qəbul ola bilməyən uşaqların seçilmiş özəl bağçalara yönləndirilməsi və onların təhsil haqqının bir hissəsinin dövlət qrantı hesabına maliyyələşdirilməsidir.

Qrant mexanizminə əsasən, hər bir uşaq üçün aylıq təhsil haqqının 250 manatlıq hissəsi dövlət tərəfindən ödəniləcək, qalan məbləğ isə valideynlər tərəfindən qarşılanacaq.

Qrant qazanan bağçalara Azərbaycan bölməsi üzrə qeydiyyatın www.bq.edu.az
 portalı vasitəsilə yaxın günlərdə başlayacağı bildirilib.

Nazirlik valideynləri portalı izləməyə və övladlarını vaxtında qeydiyyatdan keçirməyə çağırıb.