Xəzərdə suyun səviyyəsinin enməsi və kadr çatışmazlığı sektora təsir edir

Xəzər dənizində suyun səviyyəsinin enməsi, mühəndis kadrlarının ölkədən kənara üz tutması və region ölkələrində əmək bazarının dəyişməsi Azərbaycanın enerji sektorunda əsas problem olaraq qalır. Bunu SOCAR viyse prezidenti Babək Hüseynov bildirib.

Şirkət rəsmisi panel müzakirəsində deyib ki, Xəzər regionunda fəaliyyət göstərən tərəfdaş ölkələr də eyni problemlərlə üzləşir. 

“Xəzərdə suyun səviyyəsinin azalması həm bizim, həm də tərəfdaşlarımız üçün böyük problemdir. Bu məsələlərdə birgə həll yolları tapmaq vacibdir”, — o deyib.

Onun sözlərinə görə, ən ciddi çətinliklərdən biri də neft-qaz sektorunda yüksək ixtisaslı mühəndislərin yaşlanması və yeni nəslin ölkə xaricində karyera seçməsi ilə bağlıdır.

“Azərbaycanda yüzlərlə mühəndis yetişib, çoxları kitabların müəllifləridir, lakin bu nəsil artıq təqaüdə çıxır. Gənclər isə başqa ölkələrdə iş axtarmağa üstünlük verir. Bu, bizim üçün böyük problemdir,” —  o qeyd edib.

SOCAR rəsmisi əlavə edib ki, şirkət artıq Qazaxıstandan mütəxəssis cəlb etməyə başlayıb.

 “Qazaxıstanlı mütəxəssislər çox tez uyğunlaşır və yüksək peşəkarlıq göstərirlər.”

Müzakirədə, həmçinin Azərbaycanın enerji və logistika infrastrukturundan istifadənin böyük potensiala malik olduğu vurğulanıb. 

Rəsmilərin sözlərinə görə, Prezident İlham Əliyev ölkənin “keçid və tranzit mərkəzi” rolunu dəfələrlə önə çəkib.

“Azərbaycan Xəzər regionu ölkələrini — Qazaxıstanı və digər qonşu dövlətləri — Avropa bazarlarına çıxış üçün öz infrastrukturundan istifadəyə dəvət edir. Bu istiqamətdə hələ görüləsi çox iş var,” — SOCAR nümayəndəsi deyib.

O bildirib ki, SOCAR rəhbərliyinin və hökumətin mövqeyi bu prosesin genişləndirilməsinə tam dəstək verir. 

 “Bu, böyük imkanlar yaradır və biz bu potensialdan daha çox istifadə etməliyik.”

N.Təbrizli