Bakıda SSRİ bayraqları ilə yürüşə cəhd edən qrup saxlanılıb

Daxili İşlər Nazirliyi sosial şəbəkələrdə SSRİ bayraqları ilə yürüş etməyə cəhd göstərən bir qrup şəxsi müəyyən edərək saxlayıb. Bu barədə qurumdan bildirilib. 

Təşkilatçılar haqqında cinayət işi başlanıb və qrupun xarici dəstək hesabına fəaliyyət göstərdiyi açıqlanıb.

Daxili İşlər Nazirliyinin məlumatına görə, Abdulla İbrahimli, İbrahim Əsədli və yürüşdə iştirak edən digər şəxslər keçirilən əməliyyat tədbirləri nəticəsində saxlanılıb. Onlar barəsində kommunist ideologiyasının təbliği və qanunsuz fəaliyyətlə bağlı cinayət işi açılıb.

İlkin istintaq həmin şəxslərin başqa bir dövlətin ayırdığı maliyyə hesabına ofis icarəyə götürərək qrup halında fəaliyyət göstərdiyini, mütəmadi toplantılar təşkil etdiyini müəyyən edib.

Ofis və mənzillərdə aparılan baxış zamanı kommunist ideologiyasının təbliğinə dair çoxsaylı materiallar, SSRİ bayraqları, radikal məzmunlu kitablar, CD-disklər və müxtəlif elektron cihazlar götürülüb.

DİN istintaqın davam etdiyini bildirib.