ATV kanalı qanunu pozduğu üçün xəbərdarlıq alıb

Audiovizual Şura "ATV" telekanalına efirdə hipnoz və bioenerji təsirlərinin müalicəvi xüsusiyyətlərinin reklamı ilə bağlı qanun pozuntusuna görə xəbərdarlıq edib.

Şuranın onlayn iclasında noyabrın 13-də yayımlanan “Gün ortası” proqramında qonağın aparıcıya “məsafədən enerji ötürmə” üsulu tətbiq etməsi və aparıcının bunu müsbət qiymətləndirməsi müzakirə olunub.

Monitorinq nəticəsində bu çıxışın “Reklam haqqında” qanunun 29.8-ci maddəsinin – kütləvi müalicəvi seansların, hipnoz metodlarının, psixi və bioenerji təsirlərin müalicəvi xassələrinin reklamına yol verilməməsi tələbinin pozulması kimi qiymətləndirildiyi bildirilib.

Şuranın hüquqşünasları faktı pozuntu kimi təsdiqləyib. Kanalda belə halın ilk dəfə baş verdiyi nəzərə alınaraq “ATV”yə xəbərdarlıq edilməsi barədə qərar çıxarılıb.