Agentlik vətəndaşlara görə özəl klinikalara 302 milyon manatdan çox xərcləyib

2025-ci ilin ilk 10 ayında 4,8 milyon nəfər və ya əhalinin 50%-i icbari tibbi sığorta xidmətlərindən istifadə edib. Bu barədə agentliyin marketinq və ictimaiyyətlə əlaqələr departamentinin rəhbəri Aynurə Əhmədova məlumat verib.

Onun sözlərinə görə, bu müddətdə vətəndaşlara 77 milyondan çox tibbi xidmət göstərilib.

Keçən ilin eyni dövrü ilə müqayisədə müraciətlərin sayı 4%, xidmətlərin həcmi isə 12% artıb.

Əməliyyat və prosedurların sayı ötən illə müqayisədə 5% artış göstərib.

Dövlət tibb müəssisələrində ən çox ginekoloji, uroloji və oftalmoloji əməliyyatlar icra olunub. Ən yüksək göstəricilər Sabunçu Tibb Mərkəzi, Sumqayıt Tibb Mərkəzi, Yeni Klinika, Gəncə Birləşmiş Şəhər Xəstəxanası və Mərkəzi Neftçilər Xəstəxanasında qeydə alınıb.

Agentliklə müqaviləsi olan 200-dən çox özəl tibb müəssisəsi fəaliyyət göstərir. Bu sektorda sığorta çərçivəsində göstərilən tibbi xidmətlərin sayı ilin ilk 8 ayında ötən ilin müvafiq dövrü ilə müqayisədə 18% artıb. Əməliyyat müraciətləri əsasən invaziv radiologiya, oftalmologiya, ürək-damar cərrahiyyəsi və uroloji sahələr üzrə olub.

Bu xidmətlərə görə agentlik özəl klinikalara 302 milyon manatdan çox vəsait ödəyib.

Gülnar Nazimqızı