TDT-nin media nazirlərinin toplantısında kommünike imzalanıb , növbəti iclasın Qazaxıstanda keçiriləcəyi qərarlaşdırılıb

Türk Dövlətləri Təşkilatının media və informasiya üzrə məsul nazirlərinin və yüksək vəzifəli rəsmilərinin 7-ci toplantısının sonunda Kommünike imzalanıb.

Toplantı çərçivəsində üzv dövlətlərin qarşıdakı dövr üçün prioritet fəaliyyət istiqamətləri nəzərdən keçirilib və təşkilatın media və informasiya üzrə məsul nazirlərinin 8-ci toplantısının, həmçinin Media və informasiya üzrə işçi qrupunun 13-cü iclasının Qazaxıstan Respublikasında keçirilməsi qərara alınıb.

Görüşdə məlumat verilib ki, TDT çərçivəsində media sahəsində əməkdaşlıq 2020-ci ildən təsdiqlənən fəaliyyət planına uyğun olaraq genişləndirilir. Üzv ölkələr informasiya mübadiləsinin gücləndirilməsi, dezinformasiya ilə mübarizə, birgə media layihələrinin təşkili və rəqəmsal sahədə koordinasiyanın artırılması kimi istiqamətlərdə fəaliyyətlərini davam etdirəcəklər.

Özbəkistan nümayəndə heyəti toplantıda media savadlılığı, rəqəmsal bacarıqların inkişafı və kontent istehsalının gücləndirilməsi üzrə yeni proqramı təqdim edib. Proqram çərçivəsində məktəblilər, tələbələr və gənc media mütəxəssisləri üçün təlimlər, təcrübə proqramları, media laboratoriyaları və televiziya studiyalarında praktiki məşğələlər nəzərdə tutulur.

Rəsmilər bildiriblər ki, üzv dövlətlərin media sahəsində əməkdaşlığının dərinləşdirilməsi regionda sağlam informasiya mühitinin formalaşmasına, mədəni əlaqələrin möhkəmlənməsinə və gənclərin yaradıcı imkanlarının genişlənməsinə xidmət edəcək.

N.Təbrizli