Azərbaycan yeni peşə hazırlığı istiqamətlərini süni intellekt və data əsaslı ixtisaslara uyğunlaşdırır – rəsmi

Əmək bazarında sürətli transformasiya fonunda peşə hazırlığı proqramlarına süni intellekt və data əsaslı ixtisasların əlavə olunması planlaşdırılır. Bunu Dövlət Məşğulluq Agentliyinin İdarə Heyətinin sədri Sadiq Əliyev anews.az- a müsahibəsində bildirib.
Əliyevin sözlərinə görə, texnoloji dəyişikliklər yeni peşələrin yaranmasını qaçılmaz edir və bu proses mütəmadi şəkildə yenilənməlidir.

 O qeyd edib ki, əmək bazarının tələblərinə uyğun olaraq AI, data analitika və rəqəmsal bacarıqlara əsaslanan peşələrin xüsusi çəkisi artır.

Əliyev deyib ki, bu peşələrin tədrisi üçün dövlət–özəl tərəfdaşlığı çərçivəsində həm kadr hazırlığı, həm də ixtisasartırma və peşə kursları təşkil olunacaq.

Əliyev əlavə edib ki, hazırda ən çox tələb olunan peşələr üzrə bazar araşdırması aparılır və nəticələrə uyğun olaraq yeni tədris istiqamətlərinin formalaşdırılması gözlənilir.

Gülnar Nazimqızı